តុលាការបង្គាប់ឱ្យដោះលែងស្រីស្អាតបើករថយន្តបុកមនុស្សស្លាប់២នាក់ នៅខណ្ឌឬស្សីកែវនៅកណ្តាលថ្ងៃត្រង់នេះ
11-March-2016 | ដោយ មែន កំសត់
ភ្នំពេញ៖ ប្រភពព័ត៌មានពីពន្ធនាគាររាជធានីភ្នំពេញ PJ បានប្រាប់ANNថា តុលាការបានសម្រេចដោះលែងស្ត្រីវ័យក្មេងដែលបានបើករថយន្តម៉ាកកាមេរីឆ្លាមបុកមនុស្សស្លាប់២នាក់ និងរបួស៣នាក់នៅខណ្ឌឬស្សីកែវកាលពីយប់រំលងអាធ្រាត្រថ្ងៃទី១០ ខែធ្នូ ឆ្នាំ២០១៦នោះហើយ។ ប្រភពបន្តថា ជនត្រូវចោទឈ្មោះរ៉ូនី សេរីវឌ្ឍនា ភេទស្រីអាយុ២២ឆ្នាំ មុខរបរនិស្សិតមានទីលំនៅផ្ទះលេខ៤២P ផ្លូវលេខ១៥ សង្កាត់ភ្នំពេញថ្មីខណ្ឌសែនសុខ ត្រូវបានអនុញ្ញាតឱ្យទៅផ្ទះវិញទាំងកណ្តាលថ្ងៃត្រង់ម៉ោង១២ ថ្ងៃទី១១ ខែមីនា ឆ្នាំ២០១៦នេះ យោងតាមដីកាបង្គាប់ឱ្យដោះលែងរបស់ចៅក្រមនៃសាលាដំបូងក្រុងភ្នំពេញ។
សូមបញ្ជាក់ថាជនត្រូវចោទឈ្មោះ រ៉ូនី សេរីវឌ្ឍនា ភេទស្រីអាយុ២២ឆ្នាំ មុខរបរនិស្សិតមានទីលំនៅផ្ទះលេខ៤២P ផ្លូវលេខ១៥ សង្កាត់ភ្នំពេញថ្មីខណ្ឌសែនសុខ ត្រូវបានលោក ជូន សុរាសី ចៅក្រមស៊ើបសួរនៃសាលាដំបូងរាជធានីភ្នំពេញសម្រេចឃុំខ្លួនជាបណ្តោះអាសន្ននៅពន្ធនាគារ PJ កាលពីល្ងាចថ្ងៃទី២៣ ខែធ្នូ ឆ្នាំ២០១៥កន្លងទៅក្រោមបទចោទប្រកាន់ពីបទ បើកបរដោយធ្វេសប្រហែស ខ្ជីខ្ជា មិនប្រុងវ្រយ័ត្ន បណ្តាលអោយស្លាប់អ្នកដទៃ យោងតាមមាត្រា ៨៥ នៃច្បាប់ស្តីពីចរាចរណ៍ផ្លូវគោកថ្មី។
បើយោងតាមមាត្រា៨៥ នៃច្បាប់ចរាចរណ៍ថ្មីនេះជនត្រូវចោទអាចប្រឈមនឹងការផ្តន្ទាទោសដាក់ពន្ធនាគារពី១ឆ្នាំ ទៅ៣ឆ្នាំ និងពិន័យជាប្រាក់ពី៤លានរៀល ទៅ១៥លានរៀល ប៉ុន្តែជាក់ស្តែងគឺជនត្រូវចោទត្រូវបានតុលាការសម្រេចចេញដីកាដោះលែងឱ្យមានសេរីភាព ក្រោយពីឃុំខ្លួនបានត្រឹមតែប្រមាណជាជាង២ខែប៉ុណ្ណោះ ដោយមិនទាន់ទាំងបានបើកសវនការជំនុំជម្រះទោសផងនោះទេ។
គួររំឮកថា មានហេតុការណ៍គ្រោះថ្នាក់ចរាចរណ៍មួយកើតឡើងកាលពីវេលាម៉ោង២៤ និង១៥នាទីយប់រំលងអាធ្រាត្រឈានចូលថ្ងៃទី១០ ខែធ្នូឆ្នាំ ២០១៥នៅចំណុចផ្លូវជាតិលេខ៥ ក្រុមទី៤ភូមិឃ្លាំងសាំង សង្កាត់ឬស្សីកែវ។ នៅក្នុងករណីគ្រោះថ្នាក់ចរាចរណ៍នោះបានបង្កឡើងដោយរថយន្តម៉ាកកាម៉ារីឆ្លាមព៍ណប្រផេះពាក់ស្លាកលេខភ្នំពេញ2R-8395 អ្នកបើកបរដោយជនត្រូវចោទឈ្មោះ រ៉ូនី សេរីវឌ្ឍនា ភេទស្រីអាយុ២២ឆ្នាំ មុខរបរនិស្សិតមានទីលំនៅផ្ទះលេខ៤២P ផ្លូវលេខ១៥ សង្កាត់ភ្នំពេញថ្មីខណ្ឌសែនសុខ។ ចំណែកជនរងគ្រោះបីនាក់ទី១ឈ្មោះ ឡុង ភេទប្រុស(ស្លាប់) និងអ្នករួមដំណើរ២នាក់ (ស្លាប់ម្នាក់ និងរងរបួសធ្ងន់ម្នាក់) បើកបរម៉ូតូម៉ាកឌុកពាក់ស្លាកលេខភ្នំពេញ 1FF-0099។ ហើយជនរងគ្រោះទី៤ឈ្មោះ អ៊ុម ភក្ត្រា ជាមន្ត្រីនគរបាលប៉ុស្តិ៍រដ្ឋបាលឬស្សីកែវ និងទី៥ឈ្មោះ អ៊ុក ចាន់ធីម ជាកម្លាំងប្រជាការពារសង្កាត់ឬស្សីកែវ៕
ចំនួនអ្នកទស្សនា
- ថ្ងៃនេះ2771
- ម្សិលមិញ12561
- សប្តាហ៍នេះ30721
- ខែនេះ52601
- ឆ្នាំនេះ52601
- សរុប20495057